Kürdüstanda yaşananlar Azərbaycana necə təsir edəcək? – Təflisatlar 10 BƏNDDƏ

“Real” Hərəkatının icra katibi, iqtisadçı-ekspert Natiq Cəfərli Kürdüstanda keçirilən referendum seçkilərinin siyasi məqamlarını 10 bənddə sıralayıb.

Об этом сообщает Руспрес

Sosial səhifəsində baş verənləri dəyərləndirən Natiq Cəfərli bütün bu hadisələrin Azərbaycana da təsir edəcəyini, ölkəni çətin seçimlər qarşısında qoyacağını vurğulayıb.

Saytımız həmin şərhi təqdim edir:

1 – İraq parlamenti bir az öncə qərar verdi ki, Kərkükün neft yataqları mərkəzi hökumətə keçməlidir, bunun üçün hətta ora qoşun da yeritməyə hazırdır.

2 – Ərdoğan bəyan etdi ki, “Kürdüstan” bölgəsindən Ceyhan limanına gələn neft boru kəmərini qapatacaqlar, bu boru gündə 600 min barel neft daşıyır.

3 – Türkiyə və İran Şimali İraqda birgə hərbi əməliyyat keçirmək haqqında müzakirələr aparırlar. Qəribə durum yaranıb – Suriyada əks cəbhələrdə olan iki ölkə, bu məsələdə birgə hərəkət edirlər. Deməli, siyasətdə daimi dostlar yoxur, daimi maraqlar var.

4 – Dünyada 20-ci əsrdə xətkeşlə çəkilən sərhədlərin, 21-ci əsrdə dronlarla yenidən çəkilməsi prosesi gedir.

5 – Bərzani ciddi dəstək almasa heç vaxt referenduma getməzdi. İsrail də, ABŞ-da, Rusiya da “Kürdüstanın” yaranmasında maraqlıdırlar, yaradacaqlar da və bu bölgədə ciddi “sancılar” doğuracaq.

6 – Növbəti addım Suriyanın “kürd kontonlarında” referendum keçirilməsi olacaq.

7 – “Kürdüstanın” tanınması dənizə çıxışı baş verən zaman sürətlənəcək, çıxış ya Suriyadan, ya Türkiyədən ola bilər. Dənizə çıxışı olmayan “Kürdüstan” həmişə qonşulardan asılı olacaq, “layihənin” başbilənləri bunu istəmir.

8 – Hər hansı bir xalqın müstəqil dövlət qurmaq arzusu təbii istəkdir, amma bu xalqın deyil də, “layihə” rəhbərlərinin istəyi ilə baş verəndə müstəqil yox, marionet dövlət qurulmuş olur.

9 – “Kürdüstan”, bu ideya yiyələrinə bölgədə dünyəvi, müsəlman, sosial-demokrat bir örnək ölkə modeli üçün, əsas da Türkiyə və İrana ciddi təzyiq bölgəsi yaratmaq üçün lazımdır. Neft amili də var, amma bu qısa vadəli qazancdır, orta və uzun vadədə əsas hədəfləri yuxarıda qeyd etdiyim məsələlərdir.

10 – Bu hadisələr bütün bölgəyə, o cümlədən də Azərbaycana təsir edəcək, ölkəni bəzi çox çətin seçim qarşısında qoyacaq. Amma bizim buna nə hazırlığımız var, nə də strategiyamız.

Bu hadisələrin ilk təsiri neftin dəyərinə oldu – qiymət 58 dollara qədər qalxdı. Təbii ki, iqtisadi və orqanik səbəblər olmadan, siyasi gərginlik hesabına qalxan qiymətlər düşəcək, amma hələ ki, bu gərginlikdən qazanan neft ölkələridir.